في عهد الصحآبة والتآبعين ..
دخل في الأسلام أقوآم جديده وعند قرآئتهم " للقرآن " إحتآجوآ لـفهمة
وذلك بأن يُفسر لهم لـ صعوبة كلمآته ولأن الصحآبة والتآبعين لم يُفسروا القران كآملاً بل فسرّوا بعض الكلمات التي صَعُبت عليهم ,
أما البآقي لم يقوموآ بتفسيره لفهمهم أغلب آيآته .!
نحن كذالك ، مايردده " أجدآدنآ " الآن من كلمآت ,
هي عندهم وآضحه جليّة لكنها لدينآ غير ذلك تمآمآ
مآبين عصر وعصر نحتآج للتّوضيح ,
نحتآج لـ " توضيح " من قِبَل أبآئنآ وأجدآدنآ حتى لا نقع في الحرج , نحتآج أيضاً لتعليم أبنآئنا
وإلا فهذآ التراث سَيُدفن ويصبح في عدآد الموتى .!!
من يرفع لِوآء هذآ " الموروث القديم " هل يكون " الجيل الثآلث " هو الفآرس المُنتظر .!!
رُبمآ يكون كذلك , إذا مآ عملنآ بـدراسة هذه الثقآفة من الآن ...
لم استطيع ان اجد مقدمه لذالك سوف اذكر لكم مواقف يعدها سوف تعلمون ماذا اقصد :
....................
أذكر أنني نزلت ضيفاً على أحد الرجال كبير في السن رحمه الله رحمةً واسعةً فلما أن قرّب إليّ و إلى مرافقي العشاءَ قال لنا " هذا الفال و العقال يلحق" .
نظرتُ إلى رفيقي - وهو أقرب إليه رَحِمَاً مني - أبحث عن طرف مساعدةٍ فارتد إلي بصري خاسئاً و هو حسير ،
فقلت لنفسي "العوض و لا القطيعة" ، ثم رفعت صوتي لهذا الشيخ الوقور رحمه الله قائلاً " الله يسلمك يا أبو فلان" .
طبعاً هذا ردٌ لا طعم له و لا رائحة ، و يضر و لا ينفع ،
خاصةً عند رجلٍ ألف الصرامة و البروتوكول البدوي طوال حياته.
نسيت أن أذكر هنا
أنني لمحت بطرف عيني و الشيخ ينظر إلي و إلى رفيقي نظرةَ استغراب و شفقة.
بعد هذا الموقف ومواقف عديدة مريت بهآ ومر بهآ الكثير من حولي أيقنت أننآ جيل " مآ عنده سآلفة " 
أرى أبي . أمي . عمي . وخالي والكثير ممن عآشوآ بالجيل السآبق يعرفون تمآم المعرفة مثل هذه الردود والكلمات الغير مفهومة لدينآ حآلياً
جيلنا نحن يرى بأنهآ كلمات ليست لهآ قيمة ومثل ما يقول البعض " سخآفآت مآلهآ دآعي "
بينمآ الجيل السآبق يجزم أن الرجل أو المرأة بدون هذه الكلمآت" إنسآن غريب"
قد تقتصر معرفتنا على " تقنية " حديثة أو على عدة تقنيآت حيث أصبحنا نعرف بالجيل
" الألكتروني " وهذآ شئ جميل جدا عندما نسعى للتطور , لكن أعتقد أننا بحآجة إلى معرفة ثقآفة القدمآء حتى نُحآفظ على هذآ الموروث القديم
حتى باتت مثل هذه الكلمات تمثل حآلة خوف عند البعض خآصة عند موآجهة كبآر السن لعدم معرفتهم بالرد المفترض رده !...
وإليكم مواقف آخرى ..
ولد عمي اصغر مني بقليل كنا بعزاء لوفاة جدتي رحمة
الله عليها .. والجو العام للعزاء يتخالطه الحزن والدموع .. فالمعزين يسلمون ويعزون
فجاء احد المعزين سلم على ولد عمي وقاله : أحسن الله عزاك
فرد عليه : عز الله مقامك حزتها كان ودي الأرض تنشق وتبلعني
فيني ضحكه ماقدرت اكتمها عاااد تخيلوا الموقف الوجه حزين وفيه شويه دموع
مع ضحكه خخخخخخخخخخخـــ
::::
::
::::
قبل فتره من الزمن جيت من السفر انا وأمي ..
وقالت لي خالتي:
(هناكم العقلان ولاتعبت ) وكنت اول مره اسمع هذي الكلمه ..
قلت: آممممممم آمممممممم الله يسلمك < طوارئ
ياترى اذا احد قالك هناك العقلان
وش راح ترد عليه ؟
ثنيان :
تقول له هناك خير
ولا ندمت 
::
الضياء :
الله يسلمك
لاندمت.
::
امير القلوب :
بالنسبه لهناك العقلان في مقولتين
هناك طيب الله
او هناك الخير
::
العندليب :
هناك العقلان ترد عليه وتقووله هناك خير ،،
ولا تعبت ترد عليه وتقووله لا ندمت ،،
::
اسامه :
الله حيه والله شف هناك العقلان بعطيه ابتسامه وبضحك وبقول الله يسلمك
اما لا تعبت بقول لاندمت وإن كانه خويي مره جزاك الله خير
وبث
::
سيكرت :
هذي معروفه اخوي ...
للي يبي يتطمن على المسافر ويتمنى له السلامه
ترد عليه هنآك خير بفتح الهاء ..
::
حمودي :
واللهـ هناكـ العقلان ماعرفها
لاكن لاتعبت ردها يالغلا لاندمت
::
ظليم المشاعر :
هناك طيب الفال ولا ندمت
الرد الصحيح هو ( هناك خير ولاندمت )
فاز معنا بهذه الجولة كلاً من :
[ ثنيان .. العندليب .. سيكرت .. امير القلوب .. ظليم المشاعر ]
اما [ الضياء .. اسامه .. حمودي ] ما اقول الا الله يخلف ع اهاليكم 
في الجآنب الآخر دعونا نلقي نظره ع ثقافة " العضوآت " مع هذآ الموقف اللي حصل لي
آخـــر يوم من ايام الاختبارات النهائيه
رحـــت اخذ آختي من المدرســـه فقلت لها : هنآك الخلاص
ردت علي : الله يسلمك
فحبيت اختبر ثقافتها وقلت لها : طيب لو قلت لك خارجه من الشر وش تردين علي !! ؟
قالت : الله يسلمك
والظاهر انها ماعندها الا ذي الكلمه 
....
فخلونا نشوف بعض ردود آمهات المستقبل
لو آحد قالك :
( هناك الخلاص & خارجه من الشر )
بماذا تردين !!؟
moon’s sister :
هناك الخلاص انا اعرف معناها انو الهلاك او الموت او شيء زي كذا ..
بس بما انكـ تقول انها تنقال بعد الانتهاء من الاختبارات ,,
فاتوقع معناها يصير [ هانت مابقى شيء ] ولا [ اخيرا خلصنا ] :
برد عليه عادي زي أي رد في الحياه J حمدالله انتهت على خير
الله يوفق الجميع أي شيء
::
Ml7 s3odiat :
خخخخخخخخخ
ما ادري اصلن اول مره اسمع فيهم واول مره ادري عنهم!!
يمكن لو احد قالها لي بقول شوكرن او الله يسلمك ,,
لاني ما ادري وش اصلهـآ :/ ويمكن اسكت بس صعبه اسكت عشان كذا اقول الله يسلمك ارحم ..
::
M!$s AMo0oLA :
لو سمحت عطني ساعتين ثلاث بالكثير والرد بيكون عندكـ..,!
يبغالي جلسه
::
HAMOORAH :
والله ياكثر ماأنقالت لي هالجمله
وقتها احس اني طلعت من قفص
احس اني انسان غير بالمجتمع
بس الى الأن ماحسيت بطعمها صدق صدق
لين اخلص القياس وخلااص احس بمعنى الكلمه جد
يكون ردي
هناك خير
واذا كانت بنت مابعد تخرجت اقول عقبالك يارب
واذا أم اقول عقبال عيالك وعيال عيالك
وإذا احد قالي خارجه من الشر :
اقول الشر مايجيك ولا يعرفك ان شاء الله
::
ملاك الكون :
لو احد قال لي الجمله الاولي بقول له تسلم ومدري لو لها رد ثاني
بس الجمله الثانيه لو احد قال لي خارجه من الشر
برد واقول الشر مايجيك يالغلا تسلم
::
::
عشمة تتحدى الملل .. شطحت من الموضوع وقالت :
انا من وجهة نظري اشوف انها شي حلو
لانو يكفي ان الشخص فكر فيك واهتم فيك ويسأل عليك
بالعكس اكيد راح انبسط لما احس بهذا الاهتمام البسيط
واتوقع انو الاغلبيه يستخدمون هذي الجمل يعني هي مو غريبه
علينا
::
مش دايخه ولا بايخه :
السؤال الاول ابقول هناك خير وعافيه
السؤال الثاني ابعد الله عنك الشر
::
Real.love :
والله مدري وش بقول
بس اتوقع اكيد لكل بدايه نهايه ,, ولكل نهايه بدايه لشي ثاني
::
والله إنكم فآشلات " يالسحالي " 
خآصة مـــــلح خخخخخخخخخ
الجواب : هنآك خير
والجواب الثاني : ومن قال خرج او الشر مايجيك
الي جاوبوا صح الانستين هامورهـ ومش دايخه ...
نرجع محور حديثنا
كُل مايذكر على ألسنة " كبآر السن " فهو بلا أدنى شك
شئ قيّم ,
ينبغي علينا أن نُسقي أبدآننا بهذه " القيم " حتى نستفيد
ونُحآفظ على مآ وُهِبنآه
أعتقد أنه بجرد جلوسك مع كبير في السن ستتأثر , فلمذا تبخل / ـين على نفسك بجلسه تجلب لك
الفائده وتبعدك كثيرا عن " الموآقف المحرجه "
:
:
أجدآدنآ " أصآله وحضآره " بآقيه مدى السنين , لن تتأثر بإذن الله بـغُزعبلات " الغرب "
أو حتى بلهجآتهم , التي أصبحت اليوم أشبه ماتكون بـاللغه الرسميه لنآ !!
هل نُحَافظ على هذه " الأَصَآلة والحَضَآرَه " .!
" فقط " أنتَ وأنتِي وأنا من يحدد ذلك
في الختام لا انسى شكر كل من شاركني
البنات : [ موون سستر .. ملح .. امووله .. هاموره .. ملاك الكون .. عمشه .. ريل .. مش دايخه ]
الشباب : [ ثنيان .. الضياء .. امير القلوب .. العتدليب .. اسامه .. سيكرت .. ظليم المشاعر ]
مني لكم آطيب تحية وآجمل سلام
كلمات من التراث بدأت تتلآشى + ثقافة بعض الاعضاء
